我的好友結婚了to jo & dolphin

今天參加了大學同學的婚禮...... 怕且當年點估都估唔到，一班朋友裡頭最早結婚既會係佢，恭喜你有今日呀新郎哥!

• 一入場就見到新郎哥，但搵唔到佢條頸...... 我估佢將條頸擺左入元朗
• 桌上獎是雀巢咖啡一罐，大家R爆頭之際，內裡有張心意卡道出因由:原來新郎新娘在咖啡店認識，所以特別送上咖啡，與大家一同分享這份甜蜜
• 很不幸地，卡上出現錯別字：係甜蜜唔係甜密呀!
• 新郎企圖搞 gag 想食阿特首條水話"我會做個好老公!"
• 我和好友們今天是第6次看到新娘子: 1. CAFE ;2. 蒲台島;3. 夜訪螢火蟲;4. 新人之家;5.拎帖
• 新郎精心炮製的片段好感人! 唯獨攝影師好似當左自己係侯孝賢，一個鏡頭擺定左就行開，就算半個人出左鏡都唔理，吹咩! (不過同酒樓project 唔到全個畫面都有關係~)
• 新郎自彈自唱"真的愛妳"送俾媽媽，唱兩句就開始爆喊，最後媽媽仲上台叫佢唔好喊...... 好感人
• 新郎改左"垃圾" 的歌詞送俾新娘...... 我第一時間想起羅人的"幾許瘋語"
• 第時結婚擺酒，間場播下羅人entertain 下d 賓客都唔錯
• 聽完新郎唱歌，新娘講左句"阿tim 我真係好愛你"，100% 真感覺叫人感動，果一刻我差d喊
• 新郎成埸喊得勁過古巨基去叱吒，愈嗌佢唔好喊佢愈喊...... 把幾火，想嗌"喊飽佢啦你!"，但為免搞串個場，唯有將對白改為"喊啦! 盡情喊啦!"
• 坐在我左邊和右邊的人返家後還要繼續工作，很苦命
• 而我明天是休假的，所以仍然在寫blog
• 我衷心祝福一對新人三年抱兩，不過強烈警告新郎哥叫佢發左達先好生仔，而新郎亦表示賺唔夠1300萬唔會生...... 不過佢冇表明係千三萬港紙定柬埔寨貨幣 (用柬埔寨貨幣食飯的話，好似一餐要駛十幾萬)
• 不要相信酒樓挑的音樂，今天我聽到的震撼歌曲包括：嫌棄/愛你變成恨你/多得他...... 大吉利是!
• 恭喜晒呀陳生陳太! 祝你地一世都開開心心，早日成為大富之家...... 最好就過年前發達，然後派封大利是俾我地啦!