觀乎本人的日常打扮，相信無人估到其實我都會留意下時裝...... 其實所謂的留意，全拜刨了12年壹仔同幾年蘋果所賜。
如果可以唔睇價錢買衫，我估我會狂買DKNY。上幾季一條紅色碎花連身裙 (長擺地鐵廣告同海港城招牌位) 真係靚到暈。今年一句"LEOPARD 和LACE 不可或缺"，睇見本來有點驚...... 豹皮wow! 但DKNY 依然設計得簡約有品味。
當然，你會話，DKNY 都唔係好貴o者，唔駛咁恨法嘛...... 之但係，我又真係唔捨得拎幾千蚊買條裙wow! 在西班牙時常去H&M，同ZARA 差不多價錢，但d 衫好靚設計好特別，睇都開心呀! H&M 早前仲同Karl Lagerfield crossover推出平民版名師設計時裝...... 平民百姓都有著靚衫既權利~ 唔知幾時H&M 先會登陸香港呢?
唔知幾時開始，一陣伴娘衫熱潮直捲全城: 每逢放工時間星期六日，金百利東角道既姊妹衫店逼爆一眾整裝待發既姊妹爭相試裙，好似唔駛錢咁!!!
其實, 我真係唔明點解呢d 衫要咁死鬼! 各位姊妹請張開你地雪亮的眼睛: 只係一d 紗裙，加d 喱士，加d 絲帶，咁就賣六七舊水，有冇搞錯? 條裙d紗仲要"披" 口披到大窩口，d 吊帶又成條bra 帶咁，d 絲帶wow, 去文具店買都得啦! 咁都收六七舊水?? 學阿A小姐話齋，真係要報警投訴先得!700 蚊要買條decent 的晚裝裙，其實去ZARA 睇下都得，質素仲高12班!!!!!!
尋日本來都想買件四百幾蚊既裙，但阿眼線離眼姐姐話死都唔俾試...... 499 買條裙都冇得試, 呢個係咩世界? 仲要俾一副高傲既表情你睇，真係火都黎埋......
大狗民好看。
雖然感覺上有些熟口熟面：旁白描述各人性格的方法，像"天使愛美麗"; 有些工廠的載歌載舞片段，想起"天黑黑"。不敢說抄，只敢說似；就算真的是抄，也抄得很不錯。
尋找手指真的很過癮! 煙鏟小妹妹與bear bear 也搞笑。由於之前一天實在太勞累，所以戲是在"半夢半醒" 的情況下完成的，但也覺得好看。我沒有看過很多泰國電影，但幾次泰片給我的經驗都蠻不錯："69 兩頭勾"很有創意很好玩很爆笑，"人妖打排球"第一集也不錯。這幾套泰片給我的感覺是充滿驚喜。
有這樣的電影製作，泰國人也蠻幸福的。單靠字幕翻譯，感覺總是隔了一重，特別是歌舞片。如果香港也有這樣的製作，那怕是抄，只要抄得好就夠了。我喜歡荒誕古怪的電影，也喜歡musical，下次如果有人要怕歌舞片，希望會拍得大膽另類一點吧!
雖然明天得一早起床，但知道影藝要結業了，還是要寫blog 發洩一下情緒. 否則會癲.
一直以來最擔心的事情終於要發生了. 我記不起自己在影藝看的第一部電影是什麼...... 也許是跟家人去看黑玫瑰對黑玫瑰吧? 我在影藝看過很多電影，印像深刻的有:
地下情 (某年電影節)
坎大哈(因為我幾乎訓足全場)
我的父親母親 (套戲好刻意好作狀, 但我覺章子怡都幾靚)
Beyond the sea (好好好好好好睇)
觸不到的戀人 (少數的韓國電影)
哲古華拉日記
the ugliest woman in the world (古怪西班牙電影)
其實還有很多. 剛畢業那些年, 我幾乎每個星期都去影藝...... 正確點說來, 是去新鴻基中心. 當年 樓上雜誌店Variety 還未易手時，我跟老闆很熟，他是我的老朋友，我是年輕人. 每次看電影前，我都會跑到店去跟他談天...... 他是個很友善的人呢! 我很喜歡這種老地方, 老朋友的感覺. 幾年前, 老朋友跑到國內搞生意, 店易手了, 很有點失落的感覺. 連戲院都要結業了, 真的很想哭.
對人對事對物, 都不應投入太多感情. 為一家電影院哭, 真的有點白痴. 如何釋懷呢? 全香港只這家電影院不受手提電話鈴聲污染了...... 觀眾少, 也自律. 到戲院旁邊的麥當當買份餐, 一路睇一路食...... 一個人看電影也很快樂.
曾幾何時, 自己彷如文藝青年, 周末最常去的是arts centre, 影藝等灣仔文化蒲點. 從三聯書店旁的天橋一路前進, 或轉左或轉右. 通常都很趕, 得跑. 近年arts centre 很少去了: 大搞獨立電影, 來來去去播的都是IVA... 最愛的歐洲電影買少見少. 影藝也少去了. 很遺憾沒有看布達佩斯之戀.
星期六整天都在趕，一早趕住睇"死亡魔法"，之後就到歷史博物館聽建築講座。
這次講座的題目包括教堂/大澳棚屋/戲棚/戲院/ 茶餐廳。首個題目的講者最不濟，所說的general到不能夠；大澳和戲棚最精彩，亦最能乎合"以建築反映百姓生活"的主題。
是日講座超爆，我和A先生逼到上地面大堂看視像轉播。旁邊兩個男生，甫坐下來已打瞌睡，接著更離譜，拎部PDA 出來研究SCHEDULE 高聲對談。都算，與A先生調位，免得發MUNG。之但係，最最最乞人憎的情況出現：條粉皮講左成分幾兩分鐘手提!!!!! 佢開始講我都忍佢，但講極唔收線，我唯有同佢講:
"先生，唔好意思，你要講電話可唔可以出去講”
我明白，當日大家只係O係一個大堂睇視像，當日大堂都嘈嘈地，但，咁唔代表你可以咁近距離發聲騷擾其他觀眾。傾SCHEDULE? 講電話? 你有冇尊重過個講者呀人渣? 呢D 係咩態度? 你唔聽，大把人出面後補想坐入黎，唔該唔好阻住地球轉啦仆街!
睇戲/講座中途講手提電話的人，唔該你地自重! 有咩咁緊要唔該"爛" 出外面傾，唔好騷擾其他人!!! 人渣! 賤格! 討厭! 乞人憎!
Discovery Channel 在播有關自殺的節目。連連以自殺為頭條的媒體，也實在應多寫這樣以"自殺後遺症" 為題材的專輯，以平衡讀者心理。
自殺，於自殺者說來是一了百了：承受考試壓力的不用再考試、承受工作壓力的不用再工作、欠債的不用還錢...... 於當事人說來，問題都消失了；可是，問題哪會自動解決? 自殺者為家人、朋友遺下的問題，才是最可怕、影響最深遠的。
暫且先別說一宗自殺事件經媒體渲染後，會引起更多人動自殺念頭這"感染問題"。以最近22歲的科大畢業生為例，他父親或許從此以後會責怪自己，何解當時只想到"沖杯茶同個仔慢慢傾"，轉個頭以捉不住要自殺輕生的兒子? 怎麼自己不跑快一點? 怎麼沒有意識到原來自殺者第一次自殺失敗後兩星期是最關鍵的時間? 家人可能會不斷追問自己。Discovery Channel 的專家說，追問自己是好的。直到有一天當你不再追問自己時，就能夠釋懷...... 但我深信有人會追問和怪責自己一生一世。自殺者的家人、朋友、最親密的人，假如知道當事人有自殺的念頭，會責怪自己怎麼沒有成功制止事情的發生。喪親已經夠痛，還要活在自責的陰影下，自殺的人在事前有沒有想過？
即係咁, 我好想係呢度補發一個最合作部門獎俾前公司之IT部......
到目前為止, dept 個scanner 死左3日, 都仲係話唔得閒唔得閒唔得閒唔得閒唔得閒......
日日都要求你整機, 你做義工呀?
家陣冇糧你出架咩?
鬧完, 舒服晒
