我和我的偶像

今天晚上真的很激動!!!!

哈林演唱會實在一絕! 儘管低音時有點聲沙, 絲毫無損其功架及現場氣氛, 整個演唱會感覺和內容都是一流的...... 除了有些多餘的嘉賓. 單是哈林已經可以撐起整場喇, 草蜢和側田根本是不必要的累贅...... 常說側田唱功如何了得，當有了比較，高下立見! 側田獨唱時，平平穩穩，奈何那首歌的旋律實在太難聽(難道阿paco 覺得呢首歌都有錢聲???) .

我突然想說一下自己崇拜偶像的進程. 第一次要介定自己的偶像時, 我記得是升中一時參加了香港仔一個什麼什麼輔導班, 有份問卷是要填個人資料, 其中一項是寫"你的偶像". 當時沒什麼偶像的我, 填了當年至hit 的名字:李．克．勤! 我覺得大會堂演奏廳同月半小夜曲都好好聽嘛!

然後, 在中一那年, 我買了一盒"Grasshopper The Best" 的錄音帶, 當年覺得"心中的歌" 同"黃昏都市人" 都好好聽, 於是又同人講自己的偶像是草蜢. 想當年，我都會用草蜢三子之海報包書架! 好興架當年~

係時候講下我買既第一隻cd 喇...... 我卒之因為外表而崇拜偶像喇! 我買的第一隻cd 是鄭．伊．健! 呢隻亦都係伊健既第一隻碟, 不要哭了. 佢唱歌, 真係算吧啦, 不過"不要哭了" 旋律都仲ok. 同全港既年青人一樣, 迷戀偶像少不得買齊d碟同擰下yes card, 而家都仲收埋唔少架! 我連佢隻" 撤哈拉" 都有買, 你話我幾咁愛佢呢!!! 我最後買既伊健大碟係"一個為你甘去蹈火海的人", 跟住, 大個喇, 收手喇!

到大概中五時, 我突然愛上張宇. 冇錯, 就係來自寶島既苦情歌王子! 張宇唱到街知巷聞既"用心良苦" 曾經係我既熱播歌曲, 仲有叫"桂花釀" 既可能唔係好多人識, 不過當時真係日煲夜煲架! 望住佢"一言難盡"隻碟, 我仲曾經覺得佢幾靚仔tim!(呢d 當然得不到世人的認同啦......)

直至中六中七, 卒之俾我遇到哈林, 呢顆漂泊的心卒之可以安定落黎. 我買既第一隻哈林碟係MTV UNPLUGGED, 當時純粹因為"想念你" 同"讓我一次愛個夠" 好聽, 聽完成隻碟先至驚為天人!!! "改變所有的錯" 同埋"想哭就到我懷裡哭", 真係好聽到想哭!!!!! 哈林演繹每首歌都充滿感情但絕不造作, 令每首歌充滿生命力. 歌, 原來可以這樣好聽.

直至"靠近", 我第一次買哈林的專輯(上一隻係演唱會錄音喇). 靠近當然正到不能夠, 但更喜歡的是"喜歡", 有種很放任很有型的感覺. "孤獨的需要" 也很精彩, 歌詞內容更令我開竅:
總有一種莫名的衝動擁抱我 想去一個從來未到過的地方
孤獨的需要 找地方把自己藏好
把傷口打開 細心照顧慢慢治療
只是種孤獨的需要 我不是任性請你明暸
愛情與孤獨不該做比較 沒有誰比誰更好
我常常都去拋下一切一個人跑到沒有去過又沒有認識我的地方.

從大學一年級, 我等了足足10年, 卒之可以看到哈林的演唱會. 10年間, 我遇到齊豫, 蔡琴, 羅大佑, 孫燕姿, 達明, LES MISERABLES, 通通都是叫我難忘和震撼的表演,但, 但沒有一個叫我激動至此. 因為我真的期待了足足10年. 今天, 聽到"改變所有的錯", 聽到"想哭就到我懷裡哭", "只有為你", "老實情歌", 真的感動得想哭了...... 想不到可以坐在紅館第3行聽哈林唱歌呢! 還有很值得開心的是, 今天和認識了快10年的小雪人和小啤子一齊睇哈林...... 想當年我同小雪人都常在宿舍房煲"靠近"架! 真的老了, 開始愛上這種"懷念懷緬" 的感覺.

*今天發了小雪人一記脾氣, 仲要嚇親A先生, 對不起喇...... 不過你地都知啦, 小刺子實在係太緊張嘛, 哈哈, 不好意思!